Heimagert pestó

búðu til þína eigin uppskrift

  • Heimagert pestó
Sumarið er tíminn þegar kryddjurtirnar vaxa og dafna. 

Margir rækta kryddjurtir úti í glugga, á svölunum eða úti í garði yfir sumarmánuðina. Á þessum tíma er úrvalið í matvörubúðunum líka gott og oftast hægt að fá fallegar plöntur þar. Ferskar kryddjurtir eru dásamlegar í matargerð, og upplagt að útbúa gott pestó úr ferskum kryddjurtum. 

Nokkrar góðar pestó uppskriftir

Grænkálspestó 
Kryddjurtapestó 
Pestó með kjúklingabaunum
Hundasúrupestó 

Ef þig langar að virkja sköpunarkraftinn og búa til þína eigin pestó uppskrift þá er hér ein leið til að nálgast málið. Gott pestó inniheldur oft hnetur, kryddjurtir, safa úr sítrusávexti, kaldpressaða olíu og svo eitthvað bragðgott eins og ólífur/hvítlauk/chili og svo má alltaf bæta smá grænmeti út í líka. 

Búðu til þína eigin uppskrift

1. Veldu hnetur til að rista: furuhnetur - pekanhnetur - kasjúhnetur - möndlur - heslihnetur - fræ (50-75g)
2. Veldu kryddjurtir: basilíka - kóríander - salvía - steinselja - minta - rósmarín (50g)
3. Veldu súrt: sítrónusafi - lime - appelsína - mandarína (1-3 msk)
4. Veldu góða kaldpressaða olíu: jómfrúarólífuolía - bragðgóð hnetuolía (½ -1 dl)
5. Veldu eitthvað bragðgott: ólífur (5-10 stk) - hvítlauksrif (1 stk) - chili (½) - döðlur (2 stk) - vegan parmesan
6. Veldu grænmeti ef vill: grænkál (2-3 blöð) - klettasalat (25g) - rauðrófubiti - brokkolíbiti
7. Sjávarsalt (½ - 1 tsk)

Byrjið á að rista hneturnar eða fræin. Setjið svo allt nema olíuna í matvinnsluvél og maukið eða merjið í mortéli. Oft er gott að mauka ekki alveg, heldur leyfa hráefninu að vera aðeins grófu, en það fer eftir smekk. Hrærið að lokum olíunni út í. Smakkið til og bætið því við sem þið teljið að geri pestóið enn betra.

Berið fram í fallegu íláti og njótið. 

Pesto