Súkkulaði og hindberjasmoothie
- Auðvelt
- Vegan: Já
- Hráfæði: Já
- Viðbættur sykur: Nei
Uppskrift
Ljúffengur súkkulaði-avókadósmoothie með frískandi hindberjamauki í botninum. Þessi smoothie er tilvalinn í morgunsárið eða sem millimál, þegar við þrufum smá dekur. Hægt er að breyta þessum smoothie í desert með því að auka á döðluskammtinn, eða bæta við öðrum sætugjafa eins og t.d. hlynsírópi.
Bleikur botn
- 1 dl hindber, ef frosin leyfið aðeins að þiðna
- ¼ epli, rifið eða skorið í litla bita
- 1 tsk engiferskot (eða rifinn engifer)
Hrærið hindberjum, rifnu epli og engifersafa saman, gott að stappa aðeins með gaffli. Setjið í botninn á tveim glösum eða krukkum.
Súkkulaðismoothie
- 1 þroskað avókadó
- 2 dl haframjólk
- 1 lúka gott spínat eða grænt kál
- 1 banani
- 2 msk kakóduft
- ½ tsk vanilla
- örlítið sjávarsalt
Setjið hráefnið í súkkulaðismoothie-inn í blandarann og blandið vel saman. Hellið yfir bleika botninn. Smoothie-inn þykknar aðeins ef þið látið standa í smá stund. Njótið með skeið, eða skellið loki á krukkuna og geymið í kæli og njótið síðar.
