Árstíðirnar


Hafrakökur

Vetur Smákökur

  • Auðvelt
  • Vegan: Já
  • Viðbættur sykur: Já
  • Mjókurlaust: Já
  • Eggjalaust: Já

Uppskrift

Þessar ljúffengu hafrakökur eru frábærar núna í nóvember, ekki alveg jafn dísætar og jólasmákökurnar, en fínar fyrir þá sem langar í kósý bakstursstund í skammdeginu. Upplagt er að nota holla fitugjafa í baksturinn, við notum ólífuolíu og möndlusmjör í þessa uppskrift, og útbleytt chiafræ til að binda kökurnar saman. Nú er um að gera að hafa það huggulegt.

  • Þurrefni 
  • 2 ½ dl haframjöl 
  • 1 ¼ dl möndlumjöl 
  • 1 ¼ dl kókospálmasykur 
  • 1 tsk kanill 
  • ½ tsk matarsódi 
  • ¼ tsk sjávarsaltflögur 

  • Blautt 
  • 1 msk chiafræ 
  • 3 msk vatn 
  • 4 msk möndlusmjör 
  • 2 msk jómfrúar ólífuolía 

  • og líka
  • 1 dl pekanhnetur 
  • ½-1 dl rúsínur
Byrjið á að hræra chiafræjunum út í vatnið og látið standa í um 10 mín svo þetta verði að þykku mauki. 

Þurrristið pekanhneturnar á pönnu og saxið smátt. 

Blandið þurrefnunum saman í skál og blandið síðan chiamauki, möndlusmjöri og ólífuolíu í aðra skál og hrærið saman (t.d. gott að nota hrærivél). Hrærið nú þurrefnunum út í blautu blönduna og blandið að lokum pekanhnetunum og rúsínunum saman við. 

Hitið ofninn í 175°C. Setjið bökunarpappír á ofnskúffu, setjið deigið á með matskeið og fletjið út með puttunum. Gott að hafa þær rúmlega ½ cm þykkar, hafið 5 cm bil á milli hverrar köku svo þær renni ekki saman. (Ath að rúsínurnar eiga það til að brenna og verða harðar ef þær eru efst á kökunum, reynið að hafa þær inní eða undir). 

Bakið í 12-15 mín við 175°C. Best er að láta kökurnar kólna aðeins á grind áður en þið njótið þeirra.