Dökkt súkkulaði 71%

• fyrir 1 stórt páskaegg:
  200g lífrænt súkkulaði (2 x 100g plötur)
  

Temprun 

Brjótið 1½ súkkulaðiplötu niður í mola og setjið í skál, saxið restina fínt og setjið til hliðar (½ plata).
Bræðið 1½ súkkulaðiplötu rólega yfir vatnsbaði á vægum hita. Hrærið í og fylgist vel með. Ef þið eigið hitamæli er gott að mæla hitastigið á súkkulaðinu sem verið er að bræða og reyna að ná 45°C hita.
Þegar 45°C hita er náð, takið þá skálina úr pottinum og hellið saxaða súkkulaðinu út í til að kæla og hrærið mjög vel.
Þegar saxaða súkkulaðið er bráðnað er mjög gott að halda áfram að hræra og hræra til að fá loft í súkkulaðið á meðan það er að kólna. Súkkulaðið er tilbúið til notkunar þegar blandan er komin niður í 35°C (eða orðið aðeins seigfljótandi ef þið eigið ekki hitamæli). 

Í formin

Við hellum tveimur lögum af súkkulaði í hvern helming, en við viljum passa að eggið verði ekki of þykkt, það er girnilegra svolítið þunnt. 

Fyrsta lag

Hellið mátulega þunnu lagi af súkkulaði í hvern helming og veltið um til að þekja allt formið. Ef það er of mikið súkkulaði í forminu hellið því þá úr svo það safnist ekki saman á einum stað þegar það storknar. 
Skafið yfir með hníf svo kanntarnir verði sléttir. 
Látið standa í um 20 mínútur á bökunarpappír í frysti (gott að byrja með opna hlutann upp í smá stund og snúa svo niður).

Annað lag

Áður en lag nr.2 fer í formin er gott að fara aftur yfir með hnífnum, ef kantarnir hafa safnast upp. 
Hellið nú meira súkkulaði í og veltið um þar til þekur. Athugið hvort skafa þurfi yfir með hníf. 
Leggið á smá stund með opna hlutann upp í kæli/frysti og svo á hvolf á bökunarpappír og látið storkna í 30 mín.

Samsetning 

Takið eggin út úr kælinum/frystinum, þið sjáið að eggin eru orðin nógu hörð ef það er komið loft á milli. Ef ekki, setjið aftur inn í kæli í smá stund.
Leggið mótin á hvolf og þá ættu helmingarnir að detta áreynslulaust út.
Best er að hafa helmingana mjög kalda þegar á að líma þá saman svo þeir haldi forminu vel.  
Setjið málsháttinn og allt sem á að fara inn í eggið áður en egginu er lokað.
Notið fljótandi súkkulaði sem lím, því er smurt á kantinn á annarri skelinni og síðan er eggið “límt” saman.
Geymið í kæli í smá stund.
Þar næst setjið þið smá “súkkulaðilím” á fótinn og límið eggið á hann.
Ef kanntarnir eru ekki nógu fallegir má laga þá með því að setja bráðið súkkulaði í sprautupoka og sprauta því allan hringinn.
Nú er kominn tími til að skreyta eggið...allt er leyfilegt! 

• ⅔ b kókosolía, bráðin 
• 1 ⅓ b hrásykur 
• ½ b mjólk, t.d. möndlu eða haframjólk 
• 2 tsk vanilla 
• 2 ½ b spelt, fínt og gróft til helminga 
• 1 tsk lyftiduft 
• 1 tsk matarsódi 
• ½ tsk sjávarsaltflögur 
• 200g súkkulaði, saxað
  

Blandið saman kókosolíu og sykri, t.d. í hrærivél eða skál. Bætið möndlumjólkinni og vanillunni út í. Setjið þurrefnin út í og blandið létt. Að lokum bætist saxað súkkulaðið við, rétt blandið því lauslega út í. 

Fínt er að kæla deigið aðeins áður en þið mótið litlar kökur til að setja á bökunarpappír. Kökurnar breiða vel úr sér í ofninum svo passið að hafa nóg bil á milli. 

Bakið kökurnar í forhituðum ofninn við 175°C, í 12-14 mínútur. 

Takið bökunarpappírinn af ofnplötunni og látið kökurnar kólna áður en þið freistist til að smakka.

Súkkulaðikakan

• 150g dökkt súkkulaði
  
• 150g kókosolía/smjör
  
• 250g kókospálmasykur
  
• 3 egg
  
• 1 tsk vanilla
  
• 100g spelt eða glútenlaust mjöl
  
• 1 dl valhnetur, smátt saxaðar
  

Byrjið á að bræða súkkulaðið og kókosolíuna/smjörið yfir vatnsbaði og látið aðeins kólna. Hrærið eggjunum útí ásamt hrásykrinum/kókospálmasykrinum vanillunni og speltinu. Setjið bökunarpappír í form og hellið deiginu útí. Setjið karamellu útá ásamt valhnetum. Bakað í 22 mín við 165°C

Sölt karamella

• 2 msk möndlusmjör
  
• ⅓ dl kókosolía
  
• ⅔ dl hlynsíróp, hunang eða kókospálmasykur
  
• 1 tsk sjávarsalt
  

Allt sett í blandara og blandað vel saman

• 2 dl haframjöl
  
• 2 dl vatn
  
• 1 ½ dl jurtamjólk (t.d. haframjólk)
  
• 1 ½ tsk kakóduft
  
• salt af hnífsoddi
  
• ¼ tsk vanilluduft
  
• 1 daðla, smátt brytjuð 
  
• ofan á:
  
• dökkt súkkulaði m/appelsínubragði (smátt saxað)
  
• appelsínusneiðar
  
• kókosmjöl
  
• jurtamjólk að eigin vali
  

Setjið hafra í pott ásamt vatni, mjólk, kakódufti, döðlu, vanillu og salti.
Suðan er látin koma upp og grauturinn látinn malla í 2-3 mín, passið að hræra í svo grauturinn brenni ekki við.
Setjið grautinn í skálar og skreytið með appelsínusneiðum, kókos og súkkulaði og hellið smávegis mjólk út á. 
Súkkulaðið er gott að rífa með fínu rifjárni, þannig verður meira úr því.