Bláberja og sólberjasulta
- Miðlungs
- Vegan: Já
Uppskrift
Þessi bláberja og sólberjasulta er sætt með döðlum. Sólberin gefa gott súrsætt bragð sem blandast vel við mild bláberin. Gott er að hafa í huga að geymsluþolið er styttra fyrir sultur sem ekki eru sættar með hreinum sykri. Hægt er að frysta hluta af sultunni ef geyma á lengi.
- 1 kg bláber
- 1 kg sólber
- 750g lífrænar döðlur, skornar í bita
- 2 msk engiferskot (eða 4 cm biti af ferskum afhýddum engifer)
- 2 tsk vanilluduft eða dropar
- 1 tsk kanill
- 1 tsk sjávarsaltflögur
- ½ tsk chili
Byrjið á að setja bláberin og sólberin í pott og látið suðuna koma upp við vægan hita. Hrærið í annað veifið.
Þegar suðan er komin upp er engiferskoti, vanillu, kanil, sjávarsalti og chili bætt út í og látið sjóða í 30 mín.
Á meðan sultan sýður er gott að mauka döðlurnar í matvinnsluvél, oft þarf að bæta svona 1-2 msk af vatni út í til að þær maukist þokkalega. (Hægt er að saxa döðlurnar í litla bita í staðinn fyrir að mauka).
Bætið döðlumaukinu í pottinn og látið sultuna sjóða í 20-30 mín í viðbót, hrærið í svo hún brenni ekki.
