Súkkulaði chiagrautur

Uppskrift

• 2 dl chiafræ 
• 7 dl jurtamjólk (t.d. kókosmjólk og möndlumjólk til helminga) 
• 1 tsk vanilla 
• ¼ tsk sjávarsalt 
• 2-3 msk hreint kakóduft 
• 
  
• Út á hvern skammt:
• ½ pera skorin í bita 
• ½-1 msk hnetusmjör 
• 1 daðla skorin í bita
  

Veljið þá jurtamjólk sem ykkur hugnast best. Kókosmjólk gefur rjómakenndustu áferðina, hægt er að nota hana til helminga með annarri mjólk.

Fyrir létta áferð hrærið chiafræin og jurtamjólkina saman í hrærivél í svona 10 mínútur eða jafnvel lengur. Áferðin verður mjög góð. Bætið svo vanillu, sjávarsalti og kakódufti út í og hrærið í stutta stund þar til kakóið hefur blandast. Hér má bæta örlitlu vatni eða jurtamjólk út í ef kakóið blandast illa.

Ef þið eigið ekki hrærivél eða nennið ekki að taka hana fram má líka hræra grautinn á einfaldan hátt í skál eða krukku. Setjið innihaldsefnin í ílát og hrærið saman með skeið. Það tekur u.þ.b. 10 mínútur fyrir chiafræin að draga í sig vökvann, gott að hræra nokkrum sinnum með skeið fyrir jafnari áferð. 

Geymið grautinn í loftþéttu íláti inni í kæli. Grauturinn geymist í 5 daga ef notuð er jurtamjólk úr fernu, en 3 daga ef notuð er heimagerð jurtamjólk. Best er að setja perur og hnetusmjör út á grautinn í hvert skipti fyrir sig, geymsluþolið styttist ef ferskir ávextir eru settir út í grautinn sem á að geyma.

Uppskriftin gefur 5-6 skammta af chiagraut.

Hverja skál af chiagraut er dásamlegt að bera fram með hnetusmjöri og perubitum. Og til að gera grautinn sætari má brytja eina döðlu út í skálina.