Grillaður borgari m/salsa
- Auðvelt
- Vegan: Já
Uppskrift
Á björtum degi er svo gaman að grilla eitthvað gott.
Í þenna borgara notum við Beyond Meat buff sem líkist kjöti og hentar bæði vegan, grænmetisætum og þeim sem vilja minnka kjötneyslu. Fæst í Hagkaup og Bónus. En endilega veljið ykkar uppáhalds grænmetisbuff í þennan borgara.
Salsað gerir þennan borgara mjög sumarlegan, svo ferskt og bragðgott. Það tekur í rauninni ekkert lengri tíma að græja salsa heldur en að skera niður grænmeti á borgara. Salsað er það eina sem þarf að skera niður í þessa uppskrift. Ef veðrið er gott er fínt að skera grænmetið niður úti á palli á meðan beðið er eftir að grillið hitni.
Borgari með salsa
- Beyond meat burger, eða þinn uppáhalds grænmetis borgari
- Hamborgarabrauð
- Spicy mayo - keypt eða heimagert (uppskrift til á síðunni undir meðlæti)
- BBQ sósa - keypt eða heimagerð (uppskrift til á síðunni undir meðlæti)
- Ferskt salsa - uppskrift hér fyrir neðan
- Grænar spírur eða kál
Salsa
- 10 kirsuberjatómatar
- ½ rauð paprika
- ½ gul paprika
- 1 avókadó
- ½ ferskur rauður chili
- 1 sítróna, hýðið af henni og safinn
- 2 msk ferskur kóríander, smátt saxaður
- 2 tsk hlynsíróp
- 1 tsk sjávarsaltflögur
Kveikið á grillinu og ef það er með hitastilli þá stillið þið það á 300°C
Á meðan grillið hitnar græjið salsað:
Skerið kirsuberjatómatana, paprikurnar, avókadóið og chili í litla bita. Rífið hýðið á sítrónunni á rifjárni og kreistið safann úr henni og setjið yfir grænmetið ásamt kóríander, hlynsírópi og sjávarsaltflögum.
Setjið borgarann á grillið.
Ef þið eruð með Beyond meat borgara er passlegt að grilla 4 mín á hvorri hlið.
Skellið brauðinu á í 10/15 sek í lokin.
Setjið væna matskeið af spicy mayo á botnbrauðið, síðan borgarann, svo slatta af salsa, þar á eftir spírur og endið á að setja væna matskeið af uppáhalds bbq sósunni ykkar í lokið á borgarabrauðinu.
Hlakkið til að njóta!
